രണ്ടായിരത്തി ഇരുപതു ഈ വർഷം വരാൻ കാത്തിരുന്ന ഒരുപാട് പേരുടെ കൂട്ടത്തിലെ ഒരു അജ്ഞാത ഹതഭാഗ്യൻ ആണ് ഞാനും. എനിക്കീ മോഹം ഉള്ളിലേക്കു പകർന്നതു അന്തരിച്ച മുൻ രാഷ്‌ട്രപതി കലാം സാർ ആയിരുന്നു. അദ്ദേഹത്തിന്റെ വിഷൻ 2020 എന്നെ ഒരുപാട് സ്വപ്‌നങ്ങൾ കാണുവാൻ പ്രേരിപ്പിച്ച ഒന്നാണ്. അങ്ങനെ കാത്തു കാത്തിരുന്നു വന്നപ്പോ അത് ഒരു ഒന്ന് ഒന്നര വരവായി പോയി. എന്റെ ഒരു വർഷത്തെ പ്രവാസത്തിന്റെ സ്വപ്‌നങ്ങൾ തകർത്തെറിഞ്ഞു കൊണ്ടാണ് കൊറോണ എന്റെ ജീവിതത്തിലേക്ക് പെയ്തിറങ്ങിയത്. ഈ ഒരു വർഷത്തിലെ മൂന്ന് മാസം റൂമിൽ ഒറ്റയ്ക്ക് ഒരു ഏകാന്ത തടവുകാരനെ പോലെയും ബാക്കി ഇന്ന് വരെ എന്നിനി നാട്ടിലേക്ക് തിരികെ പോകണം എന്നുള്ള ആലോചനയിലും മുഴുകി തീർന്നു പോയി.
കഴിഞ്ഞ ഡിസംബറിൽ ആണ് കൊറോണ സംബന്ധിക്കുന്ന വാർത്തകൾ പത്ര സാമൂഹിക മാധ്യമങ്ങളിൽ പ്രചുര പ്രചാരം നേടി കൊറോണയുടെ അകന്ന ബന്ധുവെന്ന മട്ടിൽ പെട്ടെന്ന് പടർന്നങ്ങു പിടിക്കുന്നത്. ആ സമയങ്ങളിലും എന്റെ ചിന്ത അന്ത്രാക്‌സും എബോളയും വന്നിട്ട് ചന്തു തോറ്റില്ല പിന്നെയല്ലേ ഒരു കൊറോണ എന്ന അമിതാത്മ വിശ്വാസത്തിൽ മനസ്സ് മുഴുവൻ പൗർണമി നാളിൽ തുംഗനാഥ് ക്ഷേത്ര സമീപം ഹിമ ശൃങ്ഗങ്ങളെ കണ്ടു പൂനിലാവാസ്വദിക്കുന്ന എന്റെ ഒരു വർഷത്തെ സ്വപ്നത്തെ പൂവണിയിക്കാനുള്ള പദ്ധതികൾ ആയിരുന്നു.
നാട്ടിലേക്കും തിരിച്ചുമുള്ള ടിക്കറ്റുകളും ഹരിദ്വാറിലേക്കും തിരിച്ചുമുള്ള ട്രെയിൻ ടിക്കറ്റും എല്ലാം ആ അമിതാത്മ വിശ്വാസത്തിൽ ബുക്ക് ചെയ്തു . ഏതാണ്ട് ഫെബ്രുവരി അവസാനം വരെയും ഞാനീ ഉറച്ച ആത്മ വിശ്വാസത്തിൽ ആയിരുന്നു. പക്ഷെ മാർച്ചയപ്പോഴേക്കും ചെറിയ തോതിൽ ശങ്ക വർധിച്ചു! പ്രധാനമന്ത്രി ജി ഉടനെ ദേശവാസിയോ പറയും എന്ന് അകത്തുന്നാരോ മന്ത്രിച്ചപ്പോ മാർച്ച് പാതി ക്കു തൊട്ടു മുന്നേ ട്രെയിൻ ടിക്കറ്റ്റ്സും വിമാന ടിക്കറ്റും ക്യാന്സല് ചെയ്തു കോപ്പി കത്തിച്ചു കളഞ്ഞു !!
കൃത്യം മാർച്ച് ഇരുപത്തിരണ്ടു ഞ്യാറാഴ്ച ആദ്യ പരീക്ഷണ ലോക്ക് ഡൌൺ സർദാർ നരേന്ദ്ര മോഡി അവർകൾ പ്രഖ്യാപിച്ചു തൊട്ടടുത്തന്നെ അനവരതം കാലത്തേക്കെന്ന മട്ടിൽ രാജ്യം മൊത്തം പൂട്ടിയിട്ടു !! ധാദോടെ എന്റെ ആ 2020 ലേക്കുള്ള എല്ലാ മോഹങ്ങളും സ്വപ്നങ്ങളും ഞാൻ ഭദ്രമായി 2021 ലേക്ക് ഫിക്സഡ് ടെപോസിറ്റ് ചെയ്തു !
ഇന്ത്യ അടച്ചു പൂട്ടി പിന്നെയും ദുഫായിൽ നേരം വെളുക്കാൻ കുറച്ചു ദിവസംകൂടി എടുത്തുവെങ്കിലും ഏപ്രിൽ ആദ്യവാരം ഇവിടെയും എല്ലാം അടച്ചു കുറ്റിയിട്ടു ! റൂം പാർട്ണർ ഡിസംബെറിൽ രാജി വെച്ച് പോയതിനാൽ റൂമിൽ ഒറ്റക്കായി ! ജൂൺ വരെ ഏകാന്ത വാസം, ലോകമെന്നത് ഇൻസ്റ്റയും വാട്സ് ആപ്പും പുസ്തകങ്ങളും പിന്നെ ഞാനും മാത്രം ആയി ചുരുങ്ങിയ ദിവസങ്ങൾ!! വിറ്റാമിന് ഡി ക്കുള്ള വെയിലു പോലും കൊള്ളാതെ ഉറക്കവും മേൽ പറഞ്ഞ കാര്യങ്ങളുമായി കഴിഞ്ഞു കൂടി !
ഇപ്പോൾ ക്രമേണ സംഗതികൾ എല്ലാം നോർമലിലേക്കു വന്നു തുടങ്ങി പക്ഷെ ഫിക്സഡ് ടെപോസിറ്റ് ഇട്ട സ്വപ്‌നങ്ങൾ "വീണിതലോ ധരണിയിൽ ക്ഷോണിതവുമണിഞ്ഞയ്യോ ശിവ ശിവ " എന്ന മട്ടിൽ ഇപ്പോഴും ഇന്റർസ്റ് കൂട്ടി കൂട്ടി ഇരിക്കുന്നു ! രണ്ടായിരത്തി ഇരുപത്തിയൊന്നിൽ കലണ്ടർ മാത്രേ മാറു എന്നറിയാം എന്നാലും ഒരാശ എല്ലാം ഉടനെ ശെരിയാവും ! ഒഴുക്കിനൊത്തു നീന്താൻ പഠിപ്പിച്ച 2020 നന്ദി ! 2021 എന്താ സബ്ജെക്ട് എന്നറിയില്ല എളുപ്പമാവണെ എന്ന് പ്രാർത്ഥിക്കാം !
എല്ലാര്ക്കും പുതുവത്സരാശംസകൾ !
വിഷ്ണു കുനിശ്ശേരി
